ප්‍රවීණ ලේඛිකා සෝමා ජයකොඩි අභාවප්‍රාප්ත වේ

ප්‍රවීණ ගත්කතුවරියක වන සෝමා ජයකොඩි අද (27) සිය දිවි සැරිය නිමා කළා. ඇය මිය යන විට 76 වැනි වියේ පසුවුවා.

අවුරුදු 13 දී බැති කුසුම් සඟරාවේ හාපුරා කියා කවි පන්තියක් පළවීමෙන් ලේඛන කලාවට අත් පොත් තැබූ සෝමා ජයකොඩි ලේඛිකාව රන්ගිර, මදාරා, කර්නල්ගේ බිරින්දෑවරු 1,2, බලවත්තු සහ බවලත්තු, කැඟරුවෝ අප්පච්චි, ලා දළු බෝපත්, නික්මයාම ඇතුළු නවකතා රාශියක් රසිකයින් අතරට පත් කර තිබේ.

නවෝදාට මුතු ඇටයක් ඇගේ ප්‍රථම ගුවන් විදුලි නාට්‍ය වන අතර ගුවන් විදුලි නාට්‍ය රචිකාවක් ලෙසද ඇය ජනාදරයට පත්වී තිබේ.

දරුවන් සඳහා ළමා පොත් විශාල ප්‍රමාණයක් රචනා කර ඇති සෝමා ජයකොඩි ලේඛිකාව ඇගේ බණ්ඩාරගම මැදගම පිහිටි දෙමහල් නිවෙස සෝමා ජයකොඩි ආදර්ශ පුස්තකාලය ලෙස අධ්‍යාපන අමාත්‍යංශයේ ජාතික පුස්තකාල සේවා මණ්ඩලය වෙත 2019 වසරේදී ලබාදීමට තරම් පරිත්‍යාගශීලී වූවාය. එහි ඇගේ පරිවර්තන කෘති 350 ක ප්‍රමාණයක් ඇතුළුව  තුන්දහසකට ආසන්න පොත් ප්‍රමාණයක් පාඨක අයිතියට පත්කර තිබේ.

ජනප්‍රසාදනී සම්මානය, වනිතා සම්මානය, නවලිය සම්මානය ඇතුළු සම්මාන වලින් පිදුම් ලබා ඇති සෝමා ජයකොඩි ලේඛිකාව 1947 වසරේදී යටියන්තොට මහබාගේ වත්ත ග්‍රාමයේ ඉපිද පුවක්පිටිය දකුණ පල්ලිය පාසල, පුවක්පිටිය උතුර මහා විද්‍යාලය හා නුවරඑළිය කඳපොළ මහින්ද විද්‍යාලය යන විදුහල් වලින් අධ්‍යාපනය ලබා විකුණුම් ශිල්පය පිළිබඳ ඩිප්ලෝමාවක් ද ලබා ඇත.

ජාතික අධ්‍යාපන ආයතනයේ පෙර පාසල් ගුරුවරියක ලෙසද රැකියාව කර ඇති සෝමා ජයකොඩි ලේඛිකාව පොතපත ඇසුරු කරමින් ලේඛන කලාවට මුල් තැන දෙමින් කටයුතු කර තිබේ.

Please Wait

You will be redirected automatically in 5 seconds...

If you are not redirected, click here

Redirecting in 5 seconds... Click here if not redirected